21 лютага ў Дзівінскай сярэдняй школе прайшоў урок роднай мовы

Залатыя словы, залаты чалавек, залатая саломка: менавіта гэты эпітэт падкрэслівае сапраўдныя каштоўнасці у нашым жыцці.

21 лютага адзначаецца Міжнародны Дзень роднай мовы. На шматлікіх мерапрыемствах, што праходзілі ва ўстановах адукацыі, у першую чаргу ставіцца мэта не толькі захаванне моўнай разнастайнасці, самастойнасці і самабытнасці, але і  насаложданне мілагучнымі словамі, якія паэты і празаікі сабралі ў сваіх творах, каб напісанае засталося і перадавалася з пакалення ў пакаленне.

У Дзівінскай сярэдняй школе педагог дадатковай адукацыі Юлія Віктараўна Піваварава акрамя заняткаў у аб’яднанні “Залатая саломка” падзялілася сваімі сакрэтамі напісання вершаў на беларускай мове на мерапрыемствах, што праводзіліся ў кожным класе з нагоды Міжнароднага Дня роднай мовы. Дзеці з задавальненнем гарталі калектыўныя зборнікі, у якіх былі надрукаваны вершы Юліі Віктараўны, чыталі іх і слухалі тлумачэнне незнаёмых яшчэ для малодшых школьнікаў беларускіх слоў. Празаічная замалёўка “Жанчына і каменне” дапамагла выклікаць на шчырую размову падлеткаў аб станоўчых і адмоўных рысах характару людзей. Вучні не толькі выказвалі свае думкі наконт дабра і зла, працавітасці і гультайства, але і успаміналі беларускія прыказкі на гэтую тэму.

Літаратурныя чытанні, арганізаваныя настаўніцамі беларускай мовы і літаратуры Дзівінскай школы, выклікалі цікавасць не толькі ў вучняў, але і ў працаўнікоў школы. У конкурснай праграме прагучалі нават песні на беларускай мове, пад музыку і акапэльна. Стараліся ўсе. І галоўнае, што пераможцай у гэтым спаборніцтве стала наша родная беларуская мова.

Фото и текст Юлии Пивоваровой
Служба информации kobrincity.by