Жыццё таямнічай птушкі лясоў Кобрыншчыны — рэпартаж з гнязда чорнага бусла ад Юліі Піваваравай

Зараз мы прапануем вам бліжэй пазнаёміцца з жыццём чорнага бусла і яго птушанят — бадай самай таямнічай птушкі лясоў Кобрыншчыны.

Ужо даўно я вяду назіранні за жыццём гэтых чырванакніжных прадстаўнікоў нашай фаўны. Амаль за кожнай вёскай ёсць гнёзды чорных буслоў. У мінулым годзе ў Дзівінскім лесе выраслі і сталі на крыло трое маладых буслоў. За Хабовічамі таксама ёсць не адно гняздо.

Першы палёт пары маладых птушак я назірала ў жніўні і там. Зараз на гэтым гняздзе зноў папаўненне. Але пакуль птушаняты зусім малыя і слабенькія, то ўбачыць іх складана, бо яны амаль не стаяць на лапках. Затое бацькі з характарам. Дарослыя буслы нават не злятаюць з гнязда,а прыўзнімаюць крылы і нават на шыі натапырваюць пёры. Так яны пужаюць нязваных гасцей. За Руховічамі таксама пасялілася пара чорных буслоў.

Калі я ў чарговы раз назірала за птушкамі з зацішнага куточка ў зарасніку, неяк самі сабой з'явіліся паэтычныя радкі:

Сімвал нашай Беларусі
Без сумнення — белы бусел,
Што вясною прылятае
І над хатамі лунае.

Гэта птушка брата мае,
У гушчары яго хавае.
І жыве ў нас на балотах
Чорны бусел у яркіх ботах.

Ён традыцыі шануе,
На дубах гняздо будуе.
Калі хвоя векавая,
Даспадобы ім такая.

Час ідзе, і дні мінаюць,
Птушаняты падрастаюць.
Камізэлек пух бялюткі,
Дзюбы жоўтыя ў малюткі.

Іх бацькі аберагаюць,
Кормяць і абараняюць.
Край прыгожы, сэрцу мілы,
Жнівень ім расправіць крылы.
І буслам у фраках чорных
Будзе сніцца лес прасторны.

Ю.В. Дзівін. 

Бусел палохае, аберагаючы птушанят. Відэа Юліі Піваваравай

При перепечатке контента с сайта kobrincity.by – обязательна прямая активная и индексируемая гиперссылка не ниже второго абзаца.