Беларускае саломапляценне ўключана ў спіс нематэрыяльнай культурнай спадчыны ЮНЕСКА

На 17-й сесіі Міжурадавага камітэта па ахове нематэрыяльнай культурнай спадчыны ЮНЕСКА 1 снежня ў Марока прынята рашэнне аб уключэнні беларускай намінацыі «Саломапляценне Беларусі: мастацтва, рамяство, уменні» ў Рэпрэзентатыўны спіс нематэрыяльнай культурнай спадчыны ЮНЕСКА, паведамляе БЕЛТА.

У Кобрынскiм i Драгiчынскiм районах стваралi нават саламяныя iканастасы

Творы з саломкі з'яўляюцца адной з нацыянальных найбольш адметных форм выяўлення духоўных каштоўнасцей і мастацкіх традыцый беларусаў.

У канцы XVIII - першай трэці XIX стагоддзя на Беларускім Палессі (Драгічынскі і Кобрынскі раёны Брэсцкай вобласці) склалася лакальная мастацкая школа па стварэнні саламяных іканастасаў для праваслаўных цэркваў.

Вядомы два экзэмпляры іканастаснай саламянай брамы пачатку XIX стагоддзя ў Нацыянальным мастацкім музеі Рэспублікі Беларусь і адзін — у Гродзенскім дзяржаўным гісторыка-археалагічным музеі-запаведніку. Прамых аналагаў гэтым мастацкім творам не выяўлена. Царская брама з іканастасаў палескіх цэркваў — гэта ўнікальныя ўзоры саломапляцення Беларусі высокай складанасці, якія сталі вяршыняй майстэрства саломапляцельнікаў.

Фота: скрыншоты вiдэа UNESCO

«Беларуская саломка» набыла значэнне нацыянальнага брэнда

Не будзе перабольшаннем сказаць, што ў Беларусі гэты від рамяства атрымаў новае жыццё, узбагаціў арсенал народнага мастацтва новымі знаходкамі, стаў масавым відам сучаснай мастацкай творчасці. Мастацкія вырабы і сувеніры з саломкі беспамылкова асацыююцца з Беларуссю, сведчаць аб творчых здольнасцях і працавітасці беларусаў.

Пяты беларускi нацыянальны элемент ў спісах нематэрыяльнай культурнай спадчыны ЮНЕСКА

Дарэчы, беларуская саломка стала пятым нацыянальным элементам у спісах Сусветнай нематэрыяльнай культурнай спадчыны ЮНЕСКА — разам з калядным абрадам «Калядныя цары» ў ввёсцы Семежава, урачыстасцю ў гонар шанавання iконы Маці Божай Будслаўскай у Будславе Мядзельня раёна Мiнская вобласцi, вясновым абрадам «Юр'еўскі карагод» у вёсцы Пагост у Гомельскай вобласці і культурай ляснога бортніцтва Беларусі на прыкладзе Лельчыцкага раёна Гомельскай вобласці.

Удзел у сесіі прыняла намеснік начальніка ўпраўлення па гісторыка-культурнай спадчыне Міністэрства культуры Беларусі Марыя Нецвятаева. Намінацыя падрыхтавана ў 2020-2021 гадах пры фінансавай і арганізацыйнай падтрымцы Міністэрства культуры Рэспублікі Беларусь.